Os preto de 6.000 contedores instalados na provincia recolleron unha media de 19,5 quilos por habitante, fronte aos 17,2 rexistrados de media en 2015
Os coruñeses reciclaron o pasado ano máis de 18.633 quilos de vidro, superando por primeira vez as 18 toneladas. No ano 2015 recolléranse 17.960 quilos, o que supón un incremento do 2,56%. Na provincia, a taxa de recollida de vidro é de 19,5 quilos por habitante, sendo os concellos cunha mellor taxa Mañón (41,6 quilos por habitante), Corcubión (39,9), Valdoviño (33,8), Fisterra (33,5) e Miño (32,6).
Na provincia hai 5.999 colectores verdes de envases de vidro, 88 máis que en 2015, segundo os patos feitos públicos pola directora xeral de Calidade Ambiental e Cambio Climático, María Cruz Ferreira Costa, e o xerente de zona Galicia-Asturias de Ecovidrio, Germán Fernández, durante unha rolda de prensa na que ofreceron cifras de reciclaxe deste material en toda Galicia.
Ecovidrio é unha entidade sen ánimo de lucro constituída no ano 1997 que ten como finalidade xestionar o reciclado de todos os residuos de envases de vidro en España. Así, os envases baleiros de vidro xerados en na comunidade autónoma e depositados polos galegos nos colectores verdes distribuídos por todo o territorio son recollidos selectivamente e xestionados por Ecovidrio para a súa posterior reciclaxe. Na actualidade todos os concellos de Galicia están adheridos ao convenio marco asinado entre a Consellería de Medio Ambiente e Ordenación do Territorio e Ecovidrio no ano 2013, por medio do cal se organizan e regulan as compensacións que, no seu caso, poden percibir as entidades locais pola súa participación na recollida selectiva destes residuos.
Pese ao positivo dos datos, a Consellería de Medio Ambiente e Ordenación do Territorio, traballa xa no incremento destas cifras no presente exercicio 2017 co obxectivo deste departamento autonómico seguir medrando, avanzando cara unha sociedade na que prime a economía circular. Neste senso, toda vez que a sensibilización cidadá e a proximidade aos axentes implicados na xeración deste tipo de residuos son pezas clave para o éxito dos obxectivos perseguidos, constitúen actuacións prioritarias nesta materia o fomento e mellora das recollidas selectivas, a implantación de novas recollidas específicas e a concienciación, información e educación ambiental por medio de campañas dirixidas a diferentes sectores da poboación e actividades económicas relevantes.
